2025નું વર્ષ ભારતીય રમતગમત માટે સુવર્ણ અક્ષરોમાં લખાઈ ગયું. ક્રિકેટથી લઈને કબડ્ડી, ખો-ખોથી લઈ ચેસ અને બોક્સિંગ સુધી—ભારતે આંતરરાષ્ટ્રીય મંચ પર પોતાનું દબદબું સાબિત કર્યું. પુરુષ અને મહિલા બંને ટીમોએ વિવિધ ફોર્મેટમાં શાનદાર પ્રદર્શન કરીને દેશને અનેક પ્રતિષ્ઠિત ટ્રોફીઓ અપાવી.
એશિયા કપ 2025: ભારતનો નવમો ખિતાબ
એશિયા કપ 2025ની ફાઇનલમાં ભારતે ચિરપ્રતિસ્પર્ધી પાકિસ્તાનને પરાજય આપીને રેકોર્ડ નવમી વખત ખિતાબ જીત્યો. ડિફેન્ડિંગ ચેમ્પિયન તરીકે ભારતે સતત સાત મેચ જીતીને પોતાનું વર્ચસ્વ બતાવ્યું. જો કે ટુર્નામેન્ટ દરમિયાન કેટલાક વિવાદો રહ્યા અને ખિતાબ જીત્યા બાદ પણ ટ્રોફી મુદ્દે ચર્ચાઓ ચાલતી રહી.
ચેમ્પિયન્સ ટ્રોફી: 12 વર્ષ બાદ ભારત ચેમ્પિયન
9 માર્ચ, 2025ના રોજ દુબઈમાં રમાયેલી ફાઇનલમાં ભારતે ન્યુઝીલેન્ડને 4 વિકેટથી હરાવીને 12 વર્ષ પછી ચેમ્પિયન્સ ટ્રોફીનો ખિતાબ જીત્યો. રોહિત શર્માની કેપ્ટનશીપ હેઠળ ભારતીય ટીમે શાનદાર ટીમવર્કથી આ સિદ્ધિ મેળવી.
ICC મહિલા ODI વર્લ્ડ કપ: ઐતિહાસિક વિજય
2 નવેમ્બર, 2025ના રોજ નવી મુંબઈના DY પાટિલ સ્ટેડિયમ ખાતે રમાયેલી ફાઇનલમાં ભારતે દક્ષિણ આફ્રિકાને 52 રનથી હરાવીને પહેલી વાર ICC મહિલા ODI વર્લ્ડ કપ જીત્યો. હરમનપ્રીત કૌરના નેતૃત્વમાં ભારતીય ટીમે 52 વર્ષનો ઈંતેજાર પૂરો કર્યો.
પ્રથમ બ્લાઈન્ડ મહિલા T20 વર્લ્ડ કપ ભારતના નામે
ભારતીય બ્લાઈન્ડ મહિલા ક્રિકેટ ટીમે અજેય રહેતાં પ્રથમ બ્લાઈન્ડ મહિલા T20 વર્લ્ડ કપ જીતીને ઇતિહાસ રચ્યો. કોલંબોના પી. સારા ઓવલ ખાતેની ફાઇનલમાં ભારતે નેપાળને 7 વિકેટથી હરાવ્યું. ફૂલા સરીનની ધમાકેદાર ઇનિંગ્સે ભારતને યાદગાર જીત અપાવી.
મહિલા કબડ્ડી વર્લ્ડ કપ અને એશિયન ચેમ્પિયનશિપમાં દબદબો
ઢાકામાં યોજાયેલા મહિલા કબડ્ડી વર્લ્ડ કપ 2025ની ફાઇનલમાં ભારતે ચાઇનીઝ તાઇપેઈને 35-28થી હરાવી ખિતાબ જીત્યો. આ ભારતીય ટીમનો સતત બીજો વર્લ્ડ કપ હતો. સાથે જ, એશિયન મહિલા કબડ્ડી ચેમ્પિયનશિપ 2025માં પણ ભારતે ફાઇનલમાં ઈરાનને હરાવી ગોલ્ડ મેડલ જીત્યો.
ખો ખો વર્લ્ડ કપ 2025: ડબલ ગોલ્ડ
દિલ્હીના ઇન્દિરા ગાંધી ઇન્ડોર સ્ટેડિયમમાં યોજાયેલા પ્રથમ ખો ખો વર્લ્ડ કપમાં ભારતીય પુરુષ અને મહિલા બંને ટીમોએ ખિતાબ જીતીને ઈતિહાસ રચ્યો. પુરુષ ટીમે નેપાળને 54-36 અને મહિલા ટીમે 78-40થી પરાજય આપ્યો.
એશિયન એથ્લેટિક્સ ચેમ્પિયનશિપમાં ગોલ્ડ ગ્લોરી
કોરિયાના ગુમીમાં યોજાયેલી એશિયન એથ્લેટિક્સ ચેમ્પિયનશિપ 2025માં ભારતીય મહિલા 4×400 મીટર રિલે ટીમે ગોલ્ડ મેડલ જીત્યો—2013 પછીનો આ પહેલો ગોલ્ડ હતો. સાથે જ રાંચીમાં યોજાયેલી દક્ષિણ એશિયન ચેમ્પિયનશિપમાં ભારતીય ટીમે ચેમ્પિયનશિપ રેકોર્ડ તોડ્યો.
FIDE મહિલા વર્લ્ડ કપ 2025: દિવ્યા દેશમુખનો કારનામો
જુલાઈ 2025માં જ્યોર્જિયાના બાટુમીમાં દિવ્યા દેશમુખે FIDE મહિલા વર્લ્ડ કપ જીતીને ઇતિહાસ રચ્યો. ફાઇનલમાં તેણે કોનેરુ હમ્પીને ટાઈ-બ્રેકમાં હરાવી અને સાથે જ ગ્રાન્ડમાસ્ટર બની, તેમજ 2026 કૅન્ડિડેટ્સ ટુર્નામેન્ટ માટે ક્વોલિફાય કર્યું.
વર્લ્ડ બોક્સિંગ ચેમ્પિયનશિપ: જાસ્મીન લેમ્બોરિયાનો ગોલ્ડ પંચ
લિવરપૂલમાં યોજાયેલી વર્લ્ડ બોક્સિંગ ચેમ્પિયનશિપ 2025માં જાસ્મીન લેમ્બોરિયાએ મહિલાઓની 57 કિગ્રા શ્રેણીમાં ગોલ્ડ મેડલ જીત્યો. ફાઇનલમાં તેણે પોલેન્ડની જુલિયા સ્ઝેરેમેટાને 4-1થી હરાવી ભારત માટે ઐતિહાસિક સિદ્ધિ નોંધાવી.
2025માં ભારતે રમતગમતના દરેક મંચ પર શક્તિ, પ્રતિભા અને આત્મવિશ્વાસનું પ્રદર્શન કર્યું. આ વર્ષ માત્ર ટ્રોફીઓનું નહીં, પરંતુ નવી પેઢીને પ્રેરણા આપનારા ગૌરવના ક્ષણોનું વર્ષ બની રહ્યું.
