Halvad તાલુકાના મયાપુર ગામમાં છેલ્લા ત્રણ દિવસથી અજાણ્યા જાનવરનો આતંક જોવા મળી રહ્યો છે. ગામમાં બે કુતરાઓના શિકારની ઘટના સામે આવતાં ગ્રામજનોમાં ભયનો માહોલ સર્જાયો છે.
ગ્રામજનોનો આક્ષેપ છે કે આ હુમલાઓ પાછળ દીપડો હોઈ શકે છે. જોકે હજી સુધી વનવિભાગ દ્વારા સત્તાવાર પુષ્ટિ કરવામાં આવી નથી. ગામના અલગ-अलग વિસ્તારોમાં રાત્રિના સમયે જાનવર દેખાયું હોવાની ચર્ચાઓએ લોકોમાં દહેશત ફેલાવી છે.
ત્રણ દિવસમાં બે કુતરાઓનો શિકાર
મળતી માહિતી મુજબ, છેલ્લા ત્રણ દિવસ દરમિયાન ગામના બે અલગ વિસ્તારોમાં કુતરાઓ મૃત હાલતમાં મળી આવ્યા હતા. પ્રાથમિક રીતે જાનવરે હુમલો કરીને શિકાર કર્યો હોવાનો અંદાજ છે. ઘટનાના પગલે રાત્રે બહાર નીકળવા લોકો ડરી રહ્યા છે.
ગ્રામજનોની રાત્રે પેટ્રોલિંગ વધારવાની માંગ
ગામજનો દ્વારા રાત્રે પેટ્રોલિંગ વધારવાની માંગ ઉગ્ર બની છે. ખાસ કરીને નાના બાળકો અને પશુઓની સુરક્ષાને લઈને ચિંતા વ્યક્ત કરવામાં આવી રહી છે. ગ્રામજનોનું કહેવું છે કે તંત્ર દ્વારા તાત્કાલિક પગલાં લેવામાં આવે જેથી કોઈ મોટી દુર્ઘટના ટાળી શકાય.
ફોરેસ્ટ તંત્ર સક્રિય
ઘટનાની જાણ થતા વનવિભાગની ટીમ ગામે પહોંચી તપાસ શરૂ કરી છે. આસપાસના ખેતરો અને સીમ વિસ્તારમાં પગચિહ્નોની તપાસ હાથ ધરવામાં આવી રહી છે. વનવિભાગ દ્વારા પાંજરાં મૂકવાની પણ તૈયારી કરવામાં આવી રહી હોવાનું જાણવા મળે છે.
વનવિભાગે ગ્રામજનોને અપીલ કરી છે કે જો કોઈ અજાણ્યું જાનવર દેખાય તો ગભરાવું નહીં અને તરત જ સંબંધિત આરએફઓનો સંપર્ક કરવો. તેમજ રાત્રે એકલા બહાર ન નીકળવા અને પશુઓને સુરક્ષિત સ્થળે રાખવા સૂચના આપવામાં આવી છે.
આ ઘટનાએ સમગ્ર મયાપુર ગામમાં ભય અને ચિંતાનો માહોલ ઊભો કર્યો છે. હવે તંત્ર દ્વારા ઝડપથી કાર્યવાહી કરી જાનવરનો પતો લગાડવામાં આવે તેવી ગ્રામજનો અપેક્ષા રાખી રહ્યા છે.
