કેન્દ્ર સરકારના કર્મચારીઓ માટે 2026નું વર્ષ ખુશખબર લઈને આવી શકે છે. 8મા પગાર પંચને લઈને ચર્ચાઓ તેજ બની રહી છે અને તેમાં પગાર વધારા સાથે જ મોટી રકમના એરિયર મળવાની શક્યતા વ્યક્ત થઈ રહી છે.
અહેવાલ મુજબ, અગાઉના પગાર પંચોની જેમ આ વખતે પણ નવા પગારનો અમલ પાછળથી (1 જાન્યુઆરી 2026થી) લાગુ થવાની સંભાવના છે. જો અમલીકરણમાં વિલંબ થાય તો કર્મચારીઓને બાકી રકમ (એરિયર) એકસાથે ચૂકવવામાં આવશે, જે મોટી રકમ બની શકે છે.
અંદાજ મુજબ, કર્મચારીઓને 18 થી 24 મહિનાના એરિયર મળવાની શક્યતા છે. બેઝિક પગારના આધારે આ રકમ આશરે ₹3.6 લાખથી લઈને ₹15 લાખ સુધી પહોંચી શકે છે, જે કર્મચારીઓ માટે મોટી આર્થિક રાહત સાબિત થશે.
પગાર વધારાનો મુખ્ય આધાર ‘ફિટમેન્ટ ફેક્ટર’ રહેશે. કર્મચારી સંગઠનો આ ફેક્ટરને 3.0 થી 3.25 સુધી વધારવાની માંગ કરી રહ્યા છે, જેના કારણે લઘુત્તમ પગારમાં પણ નોંધપાત્ર વધારો થઈ શકે છે.
જો સરકાર આ માંગ સ્વીકારશે તો હાલના ₹18,000ના લઘુત્તમ પગારને વધારીને ₹26,000 થી ₹30,000 સુધી લઈ જવાય તેવી શક્યતા છે. કુલ મળીને, પગારમાં મોટો વધારો અને સાથે જ લાખોમાં એરિયર મળવાથી કર્મચારીઓ માટે આ પગાર પંચ “લોટરી” સમાન બની શકે છે.
નોંધ: હાલ આ તમામ આંકડા અંદાજ આધારિત છે, સરકારે હજી સત્તાવાર જાહેરાત કરી નથી.
8મું પગાર પંચ: કેન્દ્રીય કર્મચારીઓને મળશે મોટી ભેટ, પગાર વધારા સાથે ₹15 લાખ સુધીનું એરિયર શક્ય
