ખાનગી ક્ષેત્રની અગ્રણી બેંકોમાંની એક યસ બેંકના કર્મચારીઓ માટે એક ખરાબ સમાચાર છે. ખાનગી ક્ષેત્રની આ બેંકે તેના સેંકડો કર્મચારીઓને છૂટા કરી દીધા છે અને તેમને રજા આપવાનો આદેશ આપ્યો છે.યસ બેન્ક તેના ખર્ચમાં ઘટાડો કરવા માટે પગલાં લઈ રહી છે અને તે અંતર્ગત બેન્કે છટણીનો આશરો લીધો છે. રિપોર્ટમાં આ બાબત સાથે સંકળાયેલા કેટલાક લોકોને ટાંકીને કહેવામાં આવ્યું છે કે યસ બેંકે પુનર્ગઠન પગલાંના ભાગરૂપે ઓછામાં ઓછા ૫૦૦ કર્મચારીઓને છૂટા કરવાનો આદેશ આપ્યો છે. આગામી દિવસોમાં બેંક વધુ કર્મચારીઓની છટણી કરે તેવી શક્યતા છે.
બેંકે છૂટા કરાયેલા કર્મચારીઓને ૩ મહિનાના પગાર જેટલું રાહત પેકેજ આપ્યું છે. એવું કહેવામાં આવી રહ્યું છે કે આ છટણીની સૌથી વધુ અસર બ્રાન્ચ બેંકિંગ પર પડશે કારણ કે મોટાભાગના કર્મચારીઓને આ સેગમેન્ટમાંથી છૂટા કરવામાં આવ્યા છે. જો કે, આ છટણીએ હોલસેલ બેન્કિંગથી રિટેલ બેન્કિંગ સુધીના લગભગ તમામ વર્ટિકલ્સને અસર કરી છે.
બેંકે ખર્ચ ઘટાડવા માટે બહુરાષ્ટ્રીય સલાહકારની નિમણૂક કરી હતી. કન્સલ્ટન્ટના સૂચન મુજબ બેંકે આંતરિક પુનઃરચનાનું કામ શરૂ કર્યું છે. અત્યારે બેંકે ૫૦૦ લોકોને નોકરી છોડવા માટે કહ્યું છે. છટણીનો તબક્કો આગામી દિવસોમાં ચાલુ રહી શકે છે અને વધારાના કર્મચારીઓને પણ દરવાજો બતાવવામાં આવી શકે છે.
ખર્ચ ઘટાડવા માટે, યસ બેંક ડિજિટલ બેંકિંગ પર ધ્યાન કેન્દ્રિત કરી રહી છે, જેથી મેન્યુઅલ હસ્તક્ષેપની જરૂરિયાત ન્યૂનતમ રહે. આમ કરવાથી કર્મચારીઓ પર બેંકની નિર્ભરતા ઓછી થશે. છેલ્લા કેટલાક વર્ષોમાં યસ બેંકના ખર્ચમાં ઝડપથી વધારો થયો છે. છેલ્લા નાણાકીય વર્ષમાં જ ખર્ચમાં લગભગ ૧૭ ટકાનો વધારો થયો છે. આ સમયગાળા દરમિયાન બેંકના કર્મચારીઓ પરના ખર્ચમાં ૧૨ ટકાથી વધુનો વધારો થયો છે.
Visit Saurashtra Kranti E-paper here