રાજકોટમાં અગ્નિકાંડની દુર્ઘટના બાદ સરકારી વિભાગોની બેદરકારીના ખુલાસાની સાથોસાથ ભ્રષ્ટાચારના પટારા ખુલી રહ્યા છે ત્યારે આવા વધુ એક ચોંકાવનારા કિસ્સામાં લાંચ માગવાના કેસમાં સેન્ટ્રલ જીએસટીના એક સીનીયર અધિકારીને સીબીઆઇએ ઉઠાવી લેતા સનસનાટી મચી જવા પામી છે. આ સમગ્ર ઘટનામાં વધુ બે અધિકારીઓ ઝપટે ચડે તેવી આશંકા દર્શાવવામાં આવી રહી છે.આ ઘટનાને પગલે સીજીએસટી વિભાગમાં સોંપો પડી ગયો હતો.
માહિતગાર સુત્રોએ કહ્યું કે રાજકોટના રેસકોર્સ રીંગ રોડ પર આવેલી સીજીએસટી ઓફિસમાં આજે સવારે ઉઘડતી કચેરીએ જ સીબીઆઇ અધિકારીઓનો કાફલો ત્રાટક્યો હતો અને એક સીનીયર અધિકારીને ઉઠાવીને લઇ જવામાં આવ્યા હતાં.
એવી ચર્ચા છે કે સેન્ટ્રલ જીએસટીના સીનીયર અધિકારી દ્વારા કોઇપણ જાતના સમન્સ વિના રેડ કરવામાં આવી હતી અને ઘણા ગોટાળા-કરચોરી હોવાની ધાકધમકી આપીને ઘણી મોટી રકમની લાંચ માંગવામાં આવી હતી.
દોઢેક મહિના પૂર્વેના આ બનાવમાં જંગી લાંચની માગણીથી કંટાળીને વેપારી દ્વારા સીબીઆઇને ફરિયાદ કરવામાં આવી હતી. તેના આધારે વગેરે પુરાવારૂપે મોકલવામાં આવ્યા હતા. તેના આધારે ગઇ સાંજથી જ સીબીઆઇની ટીમે રાજકોટમાં ધામા નાખ્યા હતા. ફરિયાદી વેપારીને રૂબરૂ મળ્યા બાદ આજે સવારે સીજીએસટી કચેરીએ કાફલો ત્રાટક્યો હતો અને સીનીયર અધિકારીને ઉઠાવી લેવામાં આવ્યા હતાં.સીબીઆઇનો કાફલો ત્રાટકતા અને સીનીયર અધિકારીને ઉઠાવી લેવાતા ઓફિસમાં સોંપો પડી ગયો હતો અને અનેકવિધ ચર્ચા થવા લાગી હતી.
એમ કહેવાય છે કે સીજીએસટીના ત્રણ અધિકારીઓની તપાસ કરવામાં આવી હતી અને ત્યારબાદ એકને ઉઠાવી લેવામાં આવ્યા હતા અન્ય બે અધિકારીઓ પણ નિશાન પર હોવાની ચર્ચા છે. આ કેસ ભ્રષ્ટાચારનો હોવાની સ્ટાફમાં ચર્ચા હતી. અધિકારીને સાથે રાખીને તેના નિવાસસ્થાને પણ સર્ચ કાર્યવાહીની તૈયારી કરવામાં આવ્યાનું મનાય છે.આ સમગ્ર ઘટના વિશે સીબીઆઇ દ્વારા કોઇ ફોડ પાડવામાં આવ્યો નથી. સેન્ટ્રલ જીએસટી કચેરીમાં સન્નાટો પ્રસરી ગયો હતો.
Visit Saurashtra Kranti E-paper here