સુપ્રીમ કોર્ટે, NEET UG પરીક્ષાના પરિણામને લઈને દાખલ કરવામાં આવેલી અરજી પર સુનાવણી કરતી વખતે, NTA અને સરકારને પણ નોટિસ પાઠવી.
દેશની સર્વોચ્ચ અદાલતે NEET UG 2024ની કાઉન્સેલિંગ પર રોક લગાવવાનો ઇનકાર કરી દીધો છે. સોમવારે સુપ્રીમ કોર્ટમાં NEET વિરુદ્ધ દાખલ કરવામાં આવેલી અરજી પર સુનાવણી કરતી વખતે, કોર્ટે સ્વીકાર્યું કે NEET UG પરીક્ષાના પરિણામો ચોક્કસપણે પ્રભાવિત થયા છે અને NTAએ પણ આ અંગે જવાબ આપવો જોઈએ. સુપ્રીમ કોર્ટે આ મામલે NTA અને સરકારને નોટિસ પાઠવીને જવાબ માંગ્યો છે. કોર્ટે આગામી સુનાવણી 8મી જુલાઈના રોજ નક્કી કરી છે.
સર્વોચ્ચ અદાલતે 10 ઉમેદવારો દ્વારા દાખલ કરાયેલી NEET પરીક્ષા રદ કરવાની માંગ કરતી અરજી પર સુનાવણી કરતી વખતે કહ્યું કે અમે માની રહ્યા છીએ કે પરીક્ષાના પરિણામો પ્રભાવિત થયા છે અને આ અંગે NTA અને સરકારને નોટિસ જારી કરીને જવાબ માંગવામાં આવી રહ્યો છે, પરંતુ પરીક્ષા પણ રદ નહીં કરવામાં આવે અને કાઉન્સેલિંગ પર પણ પ્રતિબંધ મૂકવામાં આવશે નહીં. ન્યાયમૂર્તિ વિક્રમ નાથ અને અહસાનુદ્દીન અમાનુલ્લાહની વિશેષ બેન્ચે કાઉન્સેલિંગ અને પરીક્ષા રદ કરવા પર સ્ટે માંગતી અરજીને ફગાવી દીધી.
67 ટોપર્સથી NEET UG પર ઉઠ્યા અનેક સવાલો
NEET UG પરીક્ષા 5 મેના રોજ લેવામાં આવી હતી, જેનું પરિણામ 4 જૂને જાહેર કરવામાં આવ્યું હતું. પરિણામ અંગેની ફરિયાદો ત્યારે આવી જ્યારે 67 વિદ્યાર્થીઓએ આ પરીક્ષામાં ટોપ કર્યું. છેલ્લા 2-3 વર્ષમાં માત્ર 3-4 વિદ્યાર્થીઓ જ પરીક્ષામાં ટોપ કરી શક્યા છે, પરંતુ આ વખતે ટોપર્સની સંખ્યાએ પરીક્ષામાં ગેરરીતિઓ તરફ ધ્યાન દોર્યું છે. પરિણામ બાદ NTA પર પેપર લીકના આરોપ લાગી રહ્યા છે. જો કે, NTA એ પણ સ્વીકાર્યું છે કે તેના કેટલાક કેન્દ્રો પર પેપરમાં ગેરરીતિઓ થઈ છે. જો કે NTAએ પેપર લીકની વાતને ફગાવી દીધી છે.
શિવાંગી મિશ્રા અને અન્ય 9 લોકોએ કરી હતી અરજી
જણાવી દઈએ કે શિવાંગી મિશ્રા અને અન્ય 9 લોકોએ NEET UG પરીક્ષા રદ્દ કરવાની માંગ સાથે સુપ્રીમ કોર્ટમાં અરજી કરી હતી. આ અરજી 1 જૂનના રોજ દાખલ કરવામાં આવી હતી. તમામ 10 અરજદારોએ NEET UG પરીક્ષા ફરીથી યોજવાની માંગ કરી હતી. જણાવી દઈએ કે NTAના શેડ્યૂલ મુજબ પરિણામ પણ 10 દિવસ પહેલા જાહેર કરવામાં આવ્યું હતું. પરિણામ જાહેર કરવાની તારીખ અગાઉ 14 જૂન હતી. અરજીમાં કેટલાક ઉમેદવારોને ગ્રેસ માર્ક્સ આપવાના NTAના નિર્ણય પર પણ સવાલો ઉઠાવવામાં આવ્યા છે.